ဘူးသီးတောင် ။ ။ ရခိုင်ပြည်နယ်၊ ဘူးသီးတောင်မြို့နယ် အရှေ့တောင်ပိုင်း ကြာညိုပြင်ကျေးရွာရှိ တံတား (စိုင်းဒင်တံတား) ပေါ်တွင် စခန်းချထားသည့် စစ်သားများနှင့် နယ်ခြားစောင့်ရဲများက တံတားပေါ်မှ ဖြတ်သန်းသွားလာသူများကို စစ်ဆေးမေးမြန်းပြီး ငွေကောက်ခံလျက်ရှိသည်။

စစ်သားများနှင့် နယ်ခြားစောင့်ရဲများက တံတားပေါ်မှ ဖြတ်သန်းသွားသူများကို စစ်ဆေးမေးမြန်းပြီး အထုပ်များပါလျှင် ရှာဖွေစစ်ဆေးလေ့ရှိသည်။ ယခုအခါ စစ်ဆေးသည့်အပြင် ငွေကျပ် ၁၀၀၀/- စီပါ ကောက်ခံလျက်ရှိသည်ဟု ဒေသခံများက Rohingya Today သို့ပြောသည်။ 

နိုဝင်ဘာလ ၁၉ ရက်နေ့ နံနက်ပိုင်းတွင် ဘူးသီးတောင်မြို့နယ်၊ ကျောက်ရန်ကျေးရွာအုပ်စု၊ ထိပ်ထူးဖောက်ရွာမှ ရွာသားများသည် စိုင်းဒင်တံတားကို ဖြတ်ကူး၍ သွားနေစဉ် စစ်သားများနှင့် နယ်ခြားစောင့်ရဲများက ၎င်းတို့ကို စစ်ဆေးသည့်အခါ ၎င်းတို့က စည်းအိုးပြင်ကျေးရွာသို့ အလုပ်လုပ်ရန် သွားနေသည်ဟု ဖြေဆိုကြသော်လည်း စစ်သားများနှင့် နယ်ခြားစောင့်ရဲများက ငွေကျပ် ၁၀၀၀/- စီ ပေးရမည်ဟု တောင်းခံခဲ့သည်။ 

ရွာသားများက မိမိတို့သည် နေ့စားအလုပ်သမားများ ဖြစ်ကြောင်း၊ တစ်နေကုန် နေပူထဲတွင် ပင်ပင်ပန်းပန်း အလုပ်လုပ်ပြီး လုပ်ခ ၇၀၀၀/- သာ ရကြောင်း၊ ယင်းငွေ ၇၀၀၀/- ဖြင့် မိသားစုတစ်စု စားသောက်ရန် အလွန် ခက်ခဲကြောင်း၊ ငွေ ၁၀၀၀/- ပေးလိုက်ပါက မလောက်မင အခက်အခဲနှင့် ကြုံတွေ့ရမည် ဖြစ်ကြောင်း၊ ဆင်းရဲသားများ ဖြစ်သောကြောင့် သနားပါရန် အနူးအညွတ် တောင်းပန်၍ ပြောဆိုသော်လည်း စစ်သားများနှင့် နယ်ခြားစောင့်ရဲများက “ငွေ ၁၀၀၀/- စီ မပေးနိုင်ရင် ပြန်ကြတော့” ဟု ပြောဆိုသဖြင့် နောက်ဆုံးတွင် ငွေ ၁၀၀၀/- စီ ပေးခဲ့ရသည်။ 

ငွေပေးခဲ့သူများမှာ -- (၁) ဦးမာမတ်ရော်ဖိခ် (ဘ) ဦးအာဘူဆိဒ္ဒိက် (၂) ဦးအာဘူဘောက္ခောရ် (ဘ) ဦးမာမတ်ဆိဒ္ဒိက် (၃) ဦးနာဒိရ်ဟူဆောင်း (ဘ) ဦးအဒူရှုကူရ် (၄) ဦးအလီ (ဘ) ဦးအဒူရှုကူရ် (၅) ဦးဂျနောတ်အုလ္လာ (ဘ) ဦးဟာဖီးဇ်အာမတ် တို့ဖြစ်ကြသည်။ 

ယင်းနေ့မှစ၍ တံတားပေါ်မှ ဖြတ်သန်းသွားသူတိုင်း ငွေပေးနေရပြီး၊ အလုပ်သမားအချို့ အလုပ်လုပ်ရန် မသွားကြတော့ကြောင်း သိရသည်။