ဗီယက်နမ်အပါအဝင် နိုင်ငံတကာအသိုင်းအဝိုင်းက မြန်မာအစိုးရကို အတင်းအဓမ္မ ဖယ်ရှားခံရသည့် မြန်မာနိုင်ငံသား (ရိုဟင်ဂျာ) များကို ပြန်ခေါ်ရန်အတွက် ဆက်လက်ဖိအားပေးနေရန် လိုအပ်သည်ဟု ဘင်္ဂလားဒေ့ရှ်ဝန်ကြီးချုပ် ရှိတ်ဟာဆီနာက ပြောကြားလိုက်သည်။ 

“မြန်မာနိုင်ငံအနေနဲ့ သူတို့ရဲ့နိုင်ငံသားတွေကို ဘင်္ဂလားဒေ့ရှ်ကနေ ပြန်ခေါ်ကို ခေါ်ရမယ်၊ သူတို့ ဒီကနေ နေရပ်ပြန်ရေးအတွက် နိုင်ငံတကာအသိုင်းအဝိုင်းက ပါဝင်ကူညီစေချင်တယ်” ဟု ဗီယက်နမ်နိုင်ငံဝန်ကြီးချုပ်၏ အထူးသံတမန်၊ နိုင်ငံခြားရေး ဒုတိယဝန်ကြီး Nguyen Quoc Dzung နှင့် ယနေ့ (ဇန်နဝါရီလ ၃၀ ရက်) နံနက်ပိုင်းတွင် ၎င်း၏ နေအိမ်၌ တွေ့ဆုံစဉ် ပြောကြားသည်။ 

ဗီယက်နမ် ဝန်ကြီးချုပ်၏ အထူးသံတမန်နှင့် ဘင်္ဂလားဒေ့ရှ်ဝန်ကြီးချုပ်တို့ တွေ့ဆုံပြီးနောက် သတင်းဌာနဆိုင်ရာအတွင်းဝန် မစ္စတာအဟ်စနူလ်ကရီးမ်က သတင်းထောက်များကို အကျဉ်းချုပ်၍ ထုတ်ဖော်ပြောသည်။

ရှိတ်ဟာဆီနာက ဘင်္ဂလားဒေ့ရှ်နိုင်ငံနှင့် မြန်မာနိုင်ငံတို့အကြား ရိုဟင်ဂျာများ နေရပ်ပြန်ရေးအတွက် သဘောတူစာချုပ် ချုပ်ဆိုထားကြောင်း၊ သို့သော်လည်း  အဆုံးသတ်ထိ အကောင်အထည်ဖော်ရန် ကြန့်ကြာနေသည်ဟု ပြောသည်။ 

Bhasan Char သို့ ရိုဟင်ဂျာများကို ပြောင်းရွှေ့ခြင်းမှာ ယာယီသာဖြစ်ပြီး ၎င်းတို့သည် ၎င်းတို့၏ တိုင်းပြည်ကို ပြန်ရမည် ဖြစ်သည်ဟု ဝန်ကြီးချုပ်က ဆိုသည်။ 

ဗီယက်နမ် ဝန်ကြီးချုပ်၏ အထူးသံတမန်က ဝန်ကြီးချုပ် ရှိတ်ဟာဆီနာ ကို တစ်သန်းကျော်သည့် ရိုဟင်ဂျာများကို နေရာထိုင်ခင်း ပေးထားခြင်းအတွက် ချီးကျူးပြောဆိုပြီး၊ ကြီးမားသည့် လူသားချင်းစာနာထောက်ထားမှု အလုပ်တစ်ခု ဖြစ်သည်ဟု ပြောသည်။ 

“ဒါကတော့ ဘင်္ဂလားဒေ့ရှ်နိုင်ငံအတွက် ကြီးမားတဲ့ ဝန်ထုပ်ဝန်ပိုးတစ်ခု ဖြစ်တယ်” ဟု ၎င်းကဆိုသည်။ 

ရိုဟင်ဂျာအရေးကိစ္စနှင့် ပတ်သက်ပြီး ဘင်္ဂလားဒေ့ရှ်နိုင်ငံနှင့်အတူ စည်းရုံးညီညွတ်မှုကို ပြသသည့်အနေဖြင့် ဗီယက်နမ်နိုင်ငံက အမေရိကန်ဒေါ်လာ ငါးသောင်း လှူဒါန်းမည်ဟု ဗီယက်နမ် ဝန်ကြီးချုပ်၏ အထူးသံတမန်က ပြောကြားကြောင်း ဘင်္ဂလားဒေ့ရှ်မှ BSS သတင်းဌာနက ရေးသားဖော်ပြထားသည်။